Nganong magatagad man Ako?

Adunay kasagaran kaayong panultihon nga duha lamang ka mga butang ang siguro-kamatayon ug mga buhis. Bisan nga ang kamatayon dili kalikayan, sa kinaiyahan ang mga tawo adunay kahadlok niini ug kanunay nagpangita og pamaagi nga makalikay niini. Daghang mga adunahan nagpabagtik sa ilang mga lawas, ug nagdahum nga ang umalabut nga katilingban makaayo sa mga sakit nga makapatay nila. Ang uban nangita og mga medikong paagi sa paglikay sa pagkatigulang-aron lamang mabuhi og dugang pang mga katu-igan. Ang Biblia naghimo ug labing piho nga mga saad sa pagkaana sa anindot nga kinabuhing walay katapusan. Ug kon adunay gamay nga kahigayunan nga ang Bibliya insakto ug ang tawo mabuhi hangtud sa kahangturan, dili ba adunay kahulugan kon ato kining susihon?

Ang uban pang mahinungdanong mga butang nahilambigit sa kalidad sa kinabuhi karon ug sa umaabut. Ang mga tawo nagasto og daghang mga panahon ug kuwarta sa pagpangita’g kalipay ug kaugalingong katagbawan, nga sagad wala makakaplag og katagbawan ug tinuud nga kalinaw sa hunahuna. Ang mga bahandi, paugnat sa kusog, kabantug, panahon sa paglulinghayaw, dagkong telebisyon ug pagbakasyon ngadto sa Bermuda, tanan mapakyas sa paghatag sa dayon nga kahulugan sa tinuud nga katagbawan ngadto sa walay kalinaw nga kalag sa tawo. Kon adunay pamaagi sa pagkaplag sa yawi sa pagsinati sa tinuud nga gugma, kalipay, kalinaw ug uban pang takus tinguhaon ug tulukibon nga mga butang, dili ba makahuluganon kaayo nga magpadayon kita sa pagpangita sa maong kahibalo? Ang Kristyanismo maisugon nga nag-angkon nga kining mga butanga mahimong tinuud sa matag-adlaw niadtong nakakat-on unsaon pag palambo ang relasyon uban sa Dios pinaagi ni Jesu Cristo.

Unsa ang usa ka Kristohanon?

Sumala sa Biblia, ang usa ka Kristohanon maoy usa ka tawo nga “Naluwas.” Gitawag usab kini og “natawo pag-usab.” Sa imong unang pagkatawo – sa imong pagkahimugso niining kalibutana – natawo ka uban sa makasasala nga kinaiya. Mao kini ang pinakadakong rason ngano nga ang katawhan makasala. Sa dihang imong isugid nga si Jesus mao ang Ginoo ug magatuo ka nga gibanhaw siya sa Dios gikan sa mga patay, ikaw mahimong usa ka Kristohanon, buot ipasabut, “natawo ka pagusab” ug nahimong usa ka myembro sa pamilya sa Dios. Sa imong “pagkatawo pag-usab” madawat nimo ang usa ka bag-ong kinaiya, ang matarong nga kinaiya sa Dios ug ni Cristo.

Unsa man ang “kaluwasan”?

Ang Bibliya nagamit sa pulong “naluwas” sa pagtumbok sa mga tawo nga “nakalingkawas” gikan sa walay katapusan nga kamatayon pinaagi sa pagdawat sa gasa nga kinabuhing dayon. Sa dihang ang usa ka tawo nga dili kahibalong molangoy malunod ngadto sa tubig, mosinggit siya “luwasa ako,” ang buot ipasabut “paglingkawasa ko”. Mao kana ang kahulugan sa pulong “naluwas”. Nagpasabut kini sa “paglingkawas” gikan sa walay katapusan nga kamatayon.

Ang matag binuhat natawo diha sa sala ug kamatayon ug unya nagpakasala batok sa Dios pinaagi sa pagsupak sa Iyang mga balaod. Busa, ang matag tawo nanginahanglan nga mahilingkawas (“maluwas”) gikan sa silot sa maong sala. Ang Mga Taga-Roma 6:23 nagaingon: “Kay ang bayad sa pagpakasala mao ang kamatayon, apan ang gasa sa Dios mao ang kinabuhing walay kataposan nga anaa kang Cristo Jesus nga atong Ginoo.

Unsa man kon sa akong pagbati dili ko makasasala? Nganong mabalaka man ko bahin niini?

Bisan pa kon dili nimo bation nga ikaw makasasala, kon ikaw matinud-anon, imong mamatikdan nga adunay hinungdanong ikasaway mahitungod kanimo ug sa kalibutan nga imong nahimutangan. Kitang tanan nakasinati sa atong kaugalingon nga kita nahibalo kon unsa ang angayan nato nga buhaton apan wala kita makahimo sa pagbuhat sumala niini. Kitang tanan nagpadayon pagkupot sa mga makadaut nga kinaiya bisan pa kon atong nahibaloan nga kini dili makaayo kanato. Kining maong kasinatian mao ang direkta nga resulta sa gitawag sa Bibliya nga “sala,” o kahimtang sa pagkabulag gikan sa ug pagkamasinupilon ngadto sa, kasing-kasing ug kabubut’on sa Dios. Busa, bisan pa kon mobati ka niini o dili, apektado ka sa sakit sa sala ug dili ka makalingkawas niini hangtud nga ikaw “mabakunahan” batok niini pinaagi sa gibuhat ni Jesu Cristo nga maoy nag hatag og kaluwasan alang kanato. Ang uban nga mga rilihiyon kun dili maglimod sa pagkatinuod sa sala dili makahatg og tinuud nga bayad niini.

Pila man ang akong ibayad sa kaluwasan?

Wala. Ngano man? Tungod kay human na kini bayari sa laing tawo. Nakadawat kana ba og gasa sa imong adlawng natawhan? Pila man ang imong gibayad sa maong gasa? Wala. Ngano man? Tungod kay adunay laing tawo nga nagbayad niana. Ang imo lamang gibuhat mao ang pagdawat sa maong gasa. Maayo kay ang gasa sa kaluwasan gibayaran na usab. Ang Kasulatan tataw kaayo nga nagsulti nga gibayaran ni Jesu Cristo ang kaluwasan pinaagi sa iyang kaugalingon nga kinabuhi. Ang labing inilang bersikulo sa kalibutan nagkanayon: “Kay gihigugma pag-ayo sa Dios ang kalibutan ug tungod niini gihatag niya ang iyang bugtong Anak, aron ang tanan nga motuo kaniya makabaton gayod ug kinabuhing walay katapusan” (Juan 3:16). Imong nakita, ang bayad sa sala mao ang kamatayon, ug mao nga ang Cristo namatay aron sa pagbayad sa maong utang. Ang Dios nagpadala sa iyang bugtong nga Anak, si Jesu Cristo, aron mamatay alang kanimo aron ikaw makabaton sa kinabuhi nga walay katapusan.

Ang kaluwasan miabut kanimo ingon nga usa ka “gasa.” Nakahinumdum ka sa Roma 6:23 nga atong gikutlo dili pa dugay. Nagkanayon kini “ang gasa sa Dios mao ang kinabuhing walay katapusan.” Ang Roma 6:23 dili lamang ang bugtong bersikulo nga nagtawag sa kaluwasan nga usa ka gasa. Diha sa Roma 5:15-17, ang pulong “gasa” gigamit sa lima ka mga higayon! Dili na kinahanglan nga motrabaho pa alang sa usa ka gasa- tungod kay libre kining gihatag. Ang gasa sa kaluwasan ug kinabuhing walay katapusan yanong gitanyag nganha kanimo tungod kay ang Dios nahigugma kanimo. Nganong ang Dios mahigugma kanimo? Tungod kay Siya gugma, ug Siya maoy nagbuhat kanimo. Gusto ang Dios nga ikaw makigkauban kaniya hangtud sa kahangturan, apan nag’agad kana kanimo-imo kanang desisyon. Makabaton ka ug kinabuhi nga walay katapusan pinaagi kang Jesu Cristo kon gusto ka nga makabaton niini.

Sa unsang paagi nako madawat ang walay bayad nga gasa sa kaluwasan gikan sa Dios?

Ang Kasulatan klaro kaayo niini. Ang Dios gusto kaayo nga ikaw mamaluwas, busa Iyang gihimong sayon kaayo ang tugon mahitungod niini:

Mga Taga-Roma 10:9
Kay kon pinaagi sa imong baba magasugid ikaw nga si “Jesus mao ang Ginoo,” ug ma-gatuo sa sulod sa imong kasingkasing nga siya gibanhaw sa Dios gikan sa mga patay, nan, maluwas ikaw.

Masayon, diba? Oo sayon kaayo. Usa kini ka gasa- gibayaran na kini ni Jesu Cristo ug karon gitanyag kini kanimo. Unsang matang nga “gasa” kun kini lisod kaayong angko-non? Kun atong sabton, ang gasa sayon kaayong pagadawaton.

Ang kaluwasan hilabihan kaayo ka importante, busa kinahanglan kaayo nga atong ma-sabtan ang tugon sa Dios. Aron maluwas, kinahanglan nga imong isugid pinaagi sa imong baba nga si Jesus mao ang Ginoo. Unsa man ang buut ipasabut niini? Nagpasabut kini nga imong isulti ang gipamulong sa Biblia sa tataw gayod, nga si Jesus mao ang Gi-noo, nga sa ato pa, siya mao ang Anak sa Dios kinsa namatay alang sa imong mga sala, nga nabanhaw gikan sa mga patay ug gituboy ngadto sa to-o nga kamot sa Dios. Nakasulay kana ba pag buka sa imong baba ug miingon “si Jesus mao ang Ginoo?” Abi nimo, daghang mga tawo naghunahuna nga si Jesus mao ang Ginoo, apan wala sila magasugid niini. Nganong dili man nimo isugid karon dayon? “Si Jesus mao ang Ginoo,” isulti kini.

Sa diha nga imong gisugid uban sa imong baba nga si Jesus mao ang Ginoo, ang Mga Taga-Roma 10:9 nagpadayon sa pag ingon nga motoo ka diha sa imong kasing-kasing nga siya gibanhaw sa Dios gikan sa mga patay. Unsa man ang “mutoo ka diha sa imong kasingkasing?” Nagpasabut kini nga imo kining toohan sa tinud-anay gayod. Malisud ba kana? Dili, dili gayod. Tingali nagtoo ka nga si George Washington mao ang una nga presidente sa United States, bisan pa kon wala ka makakita kaniya. Sa samang pagkaagi, adunay daghan kaayong ma katarungan nga atong toohan nga ang Dios nagbanhaw ni Jesu Cristo gikan sa mga patay.

Sa diha nga imong gisugid pinaagi sa imong baba nga si Jesus mao ang Ginoo, ug mitoo ka sulod sa imong kasingkasing nga siya gibanhaw sa Dios gikan sa mga patay, nan, naluwas ka. Ang kaluwasan sayon kaayo tungod kay gusto sa Dios nga ang tanang tawo mamaluwas. (1Tim.2: 4), ug iya kining gitanyag isip nga walay bayad nga gasa.

Sa Bag-ong Tugon daghan kaayong mga bersikulo nga nagpakiya nga ang kaluwasan sayon kaayong maangkon ug nga imo kining maangkon pinaagi sa pagtoo, o pagsalig diha kang Ginoong Jesus. Ang Bibliya kanunay nagamit niining nga pulong “Pagbaton og pagtoo kang Jesus.” “Ang pagtoo” usa ka biblikanhon nga pulong nga nagkahulugan “pagsalig”. Sa ingon niini, ang pagbaton og pagtoo diha kang Jesus nag kahulugan og pagsalig diha kaniya, ug sa ingon mosalig ka nga ang iyang nabuhat igo na kaayong makaluwas kanimo. Ang mga mosunod pipila lamang sa mga Kasulatang klarong nagatudlo nga ang kaluwasan pinaagi sa pagtoo.

Mga Taga-Roma 3:22:
“…pagkamatarong gikan sa Dios pinaagi sa pagtoo kang Jesu-Cristo.” (Ang pagkamatarung mao ang kahimtang nga ikaw nahimo na nga matarong atubangan sa Dios. Sa diha nga imong gisugid nga si Jesus mao ang Ginoo ug mitoo ka diha sa imong kasingkasing nga siya nabanhaw gikan sa mga patay, ang imong mga sala gibayaran na ug ikaw nahimong “matarong” sa atubangan sa Dios, busa ang Biblia nagaingon nga ang imong pagkamatarong” nagagikan pinaagi sa pagtoo [pagsalig] kang Jesu-Cristo. Ang tanang mga tawo nga naluwas nahimong matarong atubangan sa Dios).

Mga Taga-Roma 3:26:
Ang Dios “nagamatarung niadtong si bisan kinsa nga adunay pagtoo ni Jesus” (“Pagkamatarung”) maoy usa ka balaudnong pulong. Nahimo kita nga “matarong” sa panan-aw sa Dios tungod kay si Jesus nagbayad sa atong mga sala ug wala nay sala nga ikapasangil batok kanato, mao nga ang Biblia nagtawag kanato ug “namatarung.” Ang maayong pamaagi sa paghinumdum sa kahulugan sa “namatarung” mao ang paghunahuna nga daw ikaw wala makasala.

Mga Taga-Roma 3:28:
“… ang tawo pagamatarungon pinaagi sa pagtoo.”

Mga Taga-Roma 5:1:
“…namatarung man kita pinaagi sa pagtoo.”

Mga Taga-Roma 9:30:
“…pagkamatarung nga pinaagi sa pagtoo.”

Mga Taga-Roma 10:4:
“Kay si Cristo mao ang katapusan sa kasugoan aron mamatarung ang tanan nga may pagtoo.”

Mga Taga-Galacia 2:16:
“Kita nasayud nga ang tawo dili pagamatarungon tungod sa mga buhat sa pagbantay sa kasugoan, kondili pinaagi sa pagtoo kang Jesu-Cristo.”

Wala na kinahanglana nga mokutlo pa kita ug dugang pang mga bersikulo, ang buot ipasabut tataw kaayo-ang Dios naghimo sa pagkaluwas nga sayon kaayo. Dihay kausa nga si Apostol Pablo nabilanggo sa usa sa iyang mga panaw. Ang magbalantay sa bilanggoan nangutana kang Pablo sa usa ka pinakaimportante nga pangutana nga ikapangutana sa matag tawo: “Unsay akong buhaton aron ako mamaluwas?” (Mga Buhat 16:31). Ang tubag ni Pablo mubo lamang apan tukma: “Tumoo ka sa Ginoong Jesus ug maluwas ka.” (Mga Buhat 16:31) Sama katinuod alang kanimo ug kanako ang tinuod sa magbalantay sa bilanggoan 2000 na ka tuig ang nanglabay. Ikaw ug ako mamaluwas kon mitoo kita kang Ginoong Jesus.

Dili ba kinahanglan pa kong maghimo sa pipila ka matang sa mga buluhaton aron ako mamaluwas — magpabunyag sa tubig, pagkumpisal sa akong mga sala, ug uban pa?

Dili na kinahanglan. Gibayaran na ni Cristo ang imong kaluwasan. Gitanyag kini kanimo isip usa ka gasa. Ang Biblia nag-ingon nga ang imong kaluwasan usa ka gasa. Tataw kining nagpadayag nga imong maangkon ang kaluwasan pinaagi sa pagtoo. Tino usab kining nag-ingon nga ang kaluwasan dli maangkon pinaagi sa mga binuhatan:

Mga Taga-Efeso 2:8-9
Kay tungod sa grasya kamo nangaluwas pinaagi sa pagtoo, ug kini dili sa inyong kaugalingong kahimoan, kini hatag sa Dios-dili tungod sa mga binuhatan, aron walay bisan kinsa nga magapasigarbo.

Kini nga bersekolo tataw kaayo. Nag-ingon kini nga ikaw naluwas tungod sa grasya sa Dios pinaagi sa imong pagtoo. Nagpasabut kana nga kon ikaw adunay pagtoo diha ni Cristo, ang Dios magaluwas kanimo pinaagi sa iyang grasya (ang “grasya” mao ang dili nasukod nga kalooy sa Dios). Ang bersekolo nagpadayon sa pag-ingon nga ang kaluwasan usa ka gasa ug dili pinaagi sa mga binuhatan.

Daghang mga Kristohanon wala makasabut nga ang kaluwasan usa ka gasa sa grasya sa Dios ug kini “dili pinaagi sa mga binuhatan.” Ginatudloan sila nga aron maluwas kinahanglan sila nga moadto sa simbahan o magpuyo sa hingpit nga kinabuhi, walay inum, pagsayaw ug uban pa. Dili kana maoy bout ipasabut sa Biblia mahitungod sa kaluwasan! Walay bisan usa nga makakaplag og bersikulo nga nagaingon “Kinahanglan moadto ka sa simbahan aron mamaluwas,” tungod kay walay bersikulo nga ingon niana. Wala usab ing bersikulo nga nagaingon nga kinahanglan magpuyo ka og hingpit nga kinabuhi aron ka mamaluwas. Ang kaluwasan usa ka gasa-dili kini nimo maangkon pinaagi sa imong mga binuhatan, madawat nimo kini pinaagi sa pagtoo diha sa buhat ni Cristo. Ang Dios nagluwas kanato tungod kay nagkinahanglan kita niini, dili tungod kay ato kining gihagoan o kaha angayan kita nga modawat niini.

Adunay daghang mga tawong nagbuhat og mga maayong binuhatan nga wala man gani makasugid nga si Jesus mao ang Ginoo ug wala man gani sila magtoo nga si Jesus nabanhaw gikan sa mga patay. Kanunay silang gitudloan nga kon ikaw usa ka mayo nga tawo, ang Dios maghatag kanimo ug kinabuhi nga walay katapusan. Ang Biblia tataw kaayo nga nagaingon nga ang maayong binuhatan dili makaluwas kanimo, sumala sa atong nabasa sa Mga Taga-Efeso 2:8,9. Nindot nga butang ang pagbuhat og maayo o kaha ang mahimong “maayong tawo,” apan dili kana maoy makaluwas kanimo. Ang Biblia nagaingon nga ang dili luwas nga tawo “patay diha sa sala” (Mga Taga-Efeso 2:1), ug walay bisan kinsa nga “patay” makahimo og bisan unsa nga maayong binuhatan. Kinahanglan una nga iyang dawaton ang kinabuhi pinaagi sa bag-o nga pagkatawo, ug dayon makahimo na siya pagbuhat sa buluhaton alang sa Dios. Ayaw pagpanaghap kun unsaon pagkabaton og kinabuhing walay katapusan. Ang Dios naghatag kanimo sa iyang Pulong aron makapadayag kanimo sa dalan padulong sa kaluwasan, ug si Jesus miingon, “Ako mao ang Dalan, ang Kamatuoran ug ang Kinabuhi.” Makaadto ka sa Amahan pinaagi kang Jesus.

Mawala ba ang akong kinabuhing walay katapusan kon ako makasala human ako naluwas?

Dili ka mamaluwas pinaagi sa pagbuhat og mga maayong binuhatan, ug dili ka makabakwi sa imong kaluwasan kon ikaw makasala. Ang imong kaluwasan ug kinabuhing walay katapusan mga gasa nga gikan sa Dios. Ang Dios dili mubawi sa iyang gasa sa kaluwasan. Ang Biblia tataw kaayo bahin niini. Kini nag-ingon, “Kay ang mga gasa ug ang pagtawag gikan sa Dios dili mabakwi.”(Mga Taga-Roma 11:29). Diha sa usa ka hubad sa Bag-ong Tugon nga naila sa The Message, ang maong bersikulo gihubad sa nindot kaayong pagkahubad: “Ang mga gasa ug ang tawag sa Dios adunay hingpit nga kasigurohan-dili mawala, ug dili mabakwi.”

Daghang mga tawo nagatudlo nga kon ikaw makasala, mawala ang imong kaluwasan ug unya kinahanglan nga maluwas ka pag- usab, apan dili kana tinuud. Ang Dios gusto nga makasegurado ka pag-ayo nga ang imong kaluwasan dili mawala, mao nga ang Biblia nag pasabut gayod sa pagkamakanunayon niini sa daghang pamaagi.

• Sa imo nang nakita, ang kaluwasan gitawag og usa ka “gasa” sa daghang mga higayon, ug ang Biblia tataw kaayo nga nag ingon nga ang mga gasa sa Dios dili mabakwi.
  
  
• Ang bout ipasabut sa pulong kaluwasan mao ang “natawo pag-usab” o “bag-ong pagkatawo” (1 Pedro 1:3, 23). Kita nasayud nga ang pagkatawo magpabilin. Sa diha nga natawo ako, anak ako sa akong inahan ug amahan hangtud sa hangtud. Bisan pa ug dautan ako nga anak ug ang akong ginikanan dili mahimuut kanako, ang akong pagka anak magpabilin. Ang Dios gusto nga ang mga Kristohanon mahibalo nga Siya nahigugma kanato ug nga kita Iyang mga anak bisan pa kon unsa ang atong mga kinaiya, busa Iyang gigamit ang pulong “pagkatawo” aron sa paghulagway kon unsa ang mahitabo kanato sa dihang naluwas kita. Ang pagkahimugso kausa lamang mahitabo ug dili na mausab pa.
  
  
• Lain nga termino sa imong kaluwasan mao ang “pagkasinagup.” Tingali matingala ka ngano nga ang Dios nagaingon nga ikaw “gisagup” sa dihang ikaw nahimugso diha sa iyang panimalay ug nga kini adunay nindot kaayo nga kahulugan. Ang tubag niana nagsumikad sa kultura ug balaod sa mga Romanhon, sa panahon nga ang Bag-ong Tugon gisulat. Sumala sa baluod sa Roma ang pagkasinagup ngadto sa Romanhon nga panimalay magpabilin, apan ang natural nga natawo sa Romanhon nga panimalay mahimo pang isalikway sa ginikanan. Busa, sa pagsulat ngadto sa mga tawo nga Romanhon (sama sa mga sinulat ngadto sa Mga Taga-Roma, Mga Taga-Efeso ug sa Mga Taga-Galacia), ang Dios nagagamit og “pagkasinagup” aron masayud sila ug makasabut nga ang ilang kaluwasan dili gayodmawala.
  
  
• Sa diha nga ikaw naluwas, ang Dios naghatag kanimo og balaan nga espirito, ang Iyang gasa diha sa imong kinasuloran. Tungod kay kini espirito, dili kini nimo mabati nga kini naa sa sulod nimo, apan mao kini ang magpabilin nga timri sa Dios diha kanimo nga ikaw iya na nga anak. Ang Mga Taga-Efeso klaro kaayo niining pagkalinuwas pinaagi sa pagtoo ug unya sa pagka-tinimrihan uban sa balaan nga espirito.

   

  Mga Taga-Efeso 1:13-14
  (13) Pinaagi kaniya, kamo usab, sa pagkadungog ninyo sa matuod nga pulong, sa Maayong Balita mahitungod sa pagluwas kaninyo, ug sa nanagpanoo na kamo kaniya, gitimrihan kamo, nga ang gitimri mao ang gisaad nga balaan nga espirito.
  (14) Nga mao ang patinga sa atong panulundon hangtud nga makapanag- iya na kita niini.

Basaha pag-usab ang maong mga bersikulo. Puno kaayog kahulugan kining mga pulonga. Ang Biblia nag-ingon nga ikaw gitimrihan uban sa balaan nga espirito, ang gasa sa Dios. Busa ikaw gitimrihan. Ang kaluwasan nga gikan sa Dios dili “mawala” kon ikaw makasala. Gitimrihan ka sa diha nga ikaw mitoo, ug ang maong timri mao ang “kasigurohan” sa kinabuhing walay katapusan, imong “panulundon” uban sa Ginoo.

• Tungod kay ang imong kaluwasan magpabilin ug dili kini mawala gikan kanimo, ang Dios nagingon nga ikaw Iyang anak! “Tan-awa ninyo unsang gugmaha ang gihatag kanato sa Amahan, nga paganganlan kita nga mga anak sa Dios! ug mao kana kita! Mga hinigugma, kita karon mga anak sa Dios” (1Juan 3:1,2). Sapagkatinuud dili mahimo nga ikaw anak sa Dios karon ug unya sa sunod adlaw dili ka na anak. Ang Dios nagpili og mga pulong nga atong ginagamit sa matag adlaw aron sa pag pakig dugtong kanato, ug kitang tanan nasayud nga ang mga anak magpabiling dugang sa panimalay. Walay bisan usa ka tawo nga adunay anak karon ug unya sa sunod adlaw dili na bahin sa iyang panimalay. Ingon usab niana ang pamilya sa Dios sama sa atong pamilya. Gitawag ka sa Dios nga iyang anak aron sa pagpahibalo kanimo nga ikaw magpabilin nga sakop sa iyang pamilya. Mao usab kana ang hinungdan ngano nga ang dili magtotoo wala tawga nga mga “anak” sa Dios-tungod kay dili sila kabahin sa panimalay sa Dios.

Ang mga anak adunay “binhi” sa ilang amahan nga anaa kanila, ug ang mga Kristohanon nangatawo sa “binhi nga walay pagkadunot” (1Pedro 1:23). Ang Biblia tataw kaayo nga nag ingon: Kon ikaw naluwas, nan natawo ka diha sa panimalay sa Dios, magpabilin ka nga gisagup, gitimrihan ka uban sa balaan ng espirito ug ang Dios nagtawag kanimo nga iyang anak.

Nganong gikinahanglan man nga ako mohunong sa pagpakasala kon dili man diay mawala ang akong kaluwasan?

Maayo kana nga pangutana, ug adunay usa ka maayong tubag niana. Una, ang matag usa nga magpuyo sa kinabuhing makasasala nahimong usa ka “ulipon ngadto sa sala” (Mga Taga-Roma 6:16). Ang mga tawong nagpuyo sa makasasala nga kinabuhi kanunay kining gihasul sa iyang tanlag, masub-anon, ug dili malipayon. Ug Ang sala nagkuha sa iyang bayad gikan sa katawhan ug ang mga Kristohanon gusto nga makalingkawas gikan sa paghari sa sala.

Ika-duha, nahiusa na ikaw ngadto kang Cristo, nailhan kauban kaniya sa pinakasuod nga paaging poseble. Nga ikaw gilansang kauban kaniya, namatay kauban kaniya, gilubong kauban niya, nabanhaw kauban kaniya gikan sa mga patay, ug gibayaw kauban kaniya ug nagalingkod uban kaniya sa too nga kamot sa Dios (Mga Taga-Roma 6:1-10: Mga Taga-Efeso2: 6). Tungod kay ikaw nahiusa na kauban ni Cristo, ngano nga nagtinguha ka man nga magpadayon pagpakighiusa ngadto sa sala diha sa imong adlaw-adlaw nga kinabuhi?

Ikatulo, usa ka matarong ug angayan nga mopasalamat ngadto sa naghatag kanimo og gasa. Ang Dios ug ang iyang Anak naghatag kanimo sa pinakadakong gasa sa tanan-kinabuhing walay katapusan. Ang pinakadakong gasa nga imong ikabalus mao ang imong kinabuhi nga nag-alagad ngadto kanila.

Ikaupat, daghang mga tawo nga wala makaila sa Dios ug nagkinahanglan sila og kaluwasan. Mahimo silang mamatay sa bisan unsang adlawa ug dili nila maangkon ang kinabuhi nga walay katapusan. Unsa ka dakong butang ang mawala gikan kanila! Usa sa mga katarungan nganong ang tawo mabugnaw sa Dios ug sa iglesia mao ang pagpakaaron- ingnon. Kon ikaw usa ka Kristohanon unya wala ka magkinabuhi ingon nga Kristohanon, imong gibuhat nga mas lisod alang sa dili Kristohanon ang pagduul ngadto ni Cristo.

Ikalima, kon giunsa nimo pagpuyo ug pag-alagad ning kinabuhia mao usab ang pagabasihan sa Dios sa diha nga siya maghatag na og mga ganti sa umaabut nga kinabuhi diha sa Iyang gingharian. Si Cristo mubalik nganhi sa kalibutan ug magapahimutang og usa ka gingharian (“Ang mga maaghup makapanunud sa yuta”), ug dili ang matag tawo sa maong gingharian makadawat sa managsama nga ganti. Daghang mga bersikulong nagpamatuod niini nga kamatuoran:

Mateo 16:27
Kay uban sa kahimayaan sa iyang Amahan, moanhi ang Anak sa Tawo uban sa iyang manolunda, ug unya gantihan niya ang matag usa sumala sa iyang mga binuhatan.

1 Mga Taga-corinto 3:12-15
(12) Karon kon sa ibabaw niining patukoranan adunay magabalay ginamit ang bulawan, o salapi mga bato nga hamili o kahoy, o kogon, o dagami.
(13) Ang binuhatan sa matag –usa makita ra unya kay ang adlaw sa hukom magapadayag man pinaagi sa kalayo, ug ang maong kalayo, mao ang magasulay sa binuhatan sa matag usa.
(14) Kon molungtad man ang bisan kinsang buhat nga natukod sa ibabaw sa patukoranan, nan, siya magadawat ug ganti.
(15) Ug kon ang buhat ni bisan kinsa masunog ra, nan, siya makaagum ug kapildihan.

2 Mga Taga-Corinto 5:10
Kay kitang tanan kinahanglan magapangatubang sa hukmanan ni Cristo, aron ang matag –usa magadawat sumala sa nabuhat sa iyang lawas, maayo o dautan.

Mga Taga-Colosas 3:23-25
(23) Bisan unsa ang inyong pagabuhaton, buhata kini sa kinasingkasing nga ingon sa nagaalagad kamo sa Ginoo ug dili sa tawo.
(24) Sa nasayran ninyo nga gikan sa Ginoo kamo magadawat sa panulondon ingon nga maoy inyong ganti; kay sa ingon kamo nagaalagad sa Ginoong Cristo.
(25) Kay ang nagbuhat ug dili matarung pagabalusan ra usab ug dili matarung tungod sa iyang binuhatan, ug wala unyay pinalabi.

Daghan pang mga bersikulo nga sama niini nga sa tataw naghisgot nga ang mga Kristohanon pagagantihan sa umaabut nga gingharian ni Cristo alang sa ilang mga nabuhat kaniya karon. Ang Biblia nagdasig kanimo sa pagpamuhat kutob sa imong mahimo karon aron nga ikaw pagagantihan samadagayaon unya sa umaabut nga gingharian.

Nakabuhat ako ug daghang makalilisang nga mga butang sa akong kinabuhi. Maluwas pa ba gihapon ko?

Ang Pulong sa Dios nagtataw nga ang tananng mga tawo nakasala. Ang Mga Taga-Roma 3:23 nag-ingon, “Kay ang tanan nakasala ug nakabsan sa himaya sa Dios.” Kon maghisgot kita bahin og sala, ang pagtagad sa Dios alang sa tanang tawo managsama lamang: “Walay matarung, wala, bisan usa; walay usa nga nakasabut, walay bisan usa nga nagapangita sa Dios. Ang tanan naga sukwahi, nagadungan sa pagpangadaut; walay nagabuhat ug maayo, wala, bisan usa” (Mga Taga Roma 3:10-12).

Tinud-anay ang pag- ila sa Dios sa mga tawo-kitang tanan pulos makasasala. Walay nasulat sa Biblia nga nag-ingon “Si Cristo namatay alang sa matag usa gawas sa mga mamumuno” o “Si Cristo namatay alang sa matag usa gawas sa mga mananapaw.” Ang Biblia tataw kaayo nga nagsulti nga ang Dios naghatag sa Iyang Anak aron nga “si bisan kinsa nga magatuo kaniya dili malaglag, kundili makabaton ug kinabuhi nga walay katapusan” (Juan 3:16).

Ang Apostol Pablo nag-ila sa iyang kaugalingon nga siya mao ang “labaw sa tanang makasasala,” tungod kay iyang gipaantus ug gipatay ang mga Kristohanon sa wala pa siya mahimong usa kanila. Alang kaniya, siya mao ang pinakaubos og moral sa tanang mga tawo-sa tinuod nahimong mamumuno sa katawhan sa Dios. Si Pablo mao ang nindot nga panig-ingnan sa kalooy ug pagkamapailubon sa Ginoo, nan kay ang tawong sama kaniya naluwas, bisan kinsa nga tawo mahimong maluwas usab.

Nakadungog ako nga ang mga tawo mausab sa dihang sila nangaluwas. Tinuud ba kini?

Adunay kahibulongan nga espirituhanong kausaban nga mahitabo sa imong kinabuhi sa diha nga ikaw nakabaton ug kaluwasan. Apan, ang kausaban dili dayon mahitabo diha sa imong hunahuna ug pamatasan. Ang kausaban nga mahitabo mao ang imong nadawat gikan sa Dios ug sa imong pakig relasyon uban Kaniya. Sa diha nga ikaw naluwas, ikaw:

• Nahimong Anak sa Dios.
• Gihatagan og balaan nga espiritu, ang gasa nga balaang kinaiya sa Dios diha sa sulod nimo.
• Nahimong matarung atubangan sa Dios.
• Dili na hinukman sa silot atubangan sa Dios.
• Nahimong balaan (sa ato pa, “gihimong lahi” sa atubangan sa Dios (1 Mga Taga Corinto 1:2).
• Gilukat gikan sa gahum sa sala ug kamatayon.
• Napahigawas gikan sa kamatayon tungod sa sala ngadto sa pag-angkon ug kinabuhing walay katapusan.

Kining mga kausabana matuod ug kinahanglang kusganong magahum sa pagkinabuhi ug panghunahuna sa mga Kristohanon. Apan tungod kay kining maong mga kausaban dili dihadiha makaapekto sa kinaiya sa tawo, ang matag Kristohanon magbuhat og usa ka pagpili. Motoo ra ba ka sa imong makit-an ug sa imong bation (Gee, wala nako batia nga ako matarung o balaan, ug uban pa) o motoo ba ka sa unsa ang gi-ingon sa Dios diha sa Iyang mga Pulong? Ingon nga usa ka Kristohanon, kinahanglanng makakat-on ka sa “pagkinabuhi pinaagi sa pagtoo ug dili pinaagi sa atong makita” (2 Mga Taga-Corinto 5:7). Gikinahanglan gayod sa usa ka maayong Kristohanong kinabuhi ang pagkat-on sa pagsalig kon unsa ang gisulti sa Dios. Pananglitan, ang Dios nag-ingon nga Siya nahigugma kanimo, ug ang gugma sa Dios matuud bisan pa kon wala nimo batia nga ikaw gihigugma. Sama usab niana ang gihimo sa Dios kanimo diha kang Cristo ug sa unsa ang Iyang hunahuna mahitungod kanimo. Ang Dios naghimo kanimong matarung, balaan, ug nagpahigawas kanimo sa hukom bisan pa kon wala nimo kini batia.

Nakadungog ko nga makapamatuod ka sa tawong luwas pinaagi sa mga maayong binuhatan nga iyang gibuhat.

Sa diha nga naluwas ka, nadala na ikaw ngadto sa panimalay sa Dios. Nahimo kang anak sa Dios, natawo ka pag-usab ug natimrihan na sa balaang espiritu. Apan, ang imong gawi dili sagad mausab diha-diha dayon. Matag karon ug unya makadungog kag usa ka tawo kinsa adunay manindot nga kausaban sa iyang kinabuhi nga gibuhat sa Dios sa adlaw nga siya nakabaton og kaluwasan. Pananglitan, “usa ka palahubog mohunong na dayon paghuboghubog. Kana nga klase nga kasinatian mahitabo usahay, apan kini maoy usa ka pinasahe, dili kay maoy sagad nga mahitabo.

Ang Dios naghatag og mabinantayon nga mga pahimatngon sa Iyang mga Anak mahitungod sa diosnong pagkinabuhi. Ang Biblia nag-ingon nga dili ka mamakak, manglimbong o mangawat. Nagsugo nga dili ka manapaw. Nag-ingon kini nga isalikway ang kapaitan ug panimalos ug inay magmapailubon, magmaayo ug mahigugmaon. Nag-ingon kini nga magmanggihatagon ug mainampoon. Dunay daghang mga butang ang giingon sa Biblia aron nga ikaw magpuyo sa diosnon nga kinabuhi. Nagkinahanglan kini og panahon, paningkamot ug disiplina sa pagkat-on sa pagbantay sa mga sugo sa Dios ug magpuyo ingon nga Kristohanon. Daghang mga bersikulo ang magapamatuod niini, ug magkutlo kita og duha:

Mga Taga-Galacia 5:16-17
(16) Apan ako nagaingon, panaggawi kamo diha sa Espiritu, ug ayaw ninyo pagtumana ang mga pangibog sa unod.
(17) Kay ang mga pangibog sa unod kasupak sa Espiritu, ug ang mga tinguha sa Espiritu kasupak sa unod, kay kining duha nagakasinupakay man ang usa sa usa.

Mga Taga-Roma 12:2
Ayaw kamo pagpahiuyon niining panahona sa kalibutan, kondili usba hinoon ninyo ang inyong kaugalingon pinaagi sa pagbag-o sa inyong salabutan.

Kinahanglan nga imong ibutang sa imong hunahuna ang pagsunod sa Dios ug pagtuman kon unsa ang Iyang mga sugo. Kay kon dili, nan imong gipaminawan ang “tinguha sa imong makasasalang kinaiya” ug dili nimo maangkon ang panalangin nga gikan sa Dios. Dili kanunay sayon ang pagtuman sa mga sugo sa Dios. Bisan ang bantugan nga Apostol Pablo kanunay kini nga nakigbugno sa iyang makasasalang kinaiya ug naglisod siya niini (Mga Taga –Roma 7:14-20). Dili tingali ka kanunay mulampos sa pag tuman sa mga sugo sa Dios, apan gusto siya nga ikaw mobuhat sa pinakamaayo kutob sa imong maarangan. Ikaw unya pagagantihan sa adlaw sa paghukom sa mga butang nga imong nabuhat karon alang ni Cristo. Ang pag-usab sa unodnon nga kinaiya imong buluhaton. Ang Dios motabang kanimo, apan dili Siya makahimo niini kun wala ka. Ngano nga adunay daghang gitawag nga “mga unodnong mga Kristohanon” kana tungod kay wala sila mohukom nga ilang pakigbatokan ang ilang unodnon nga kinaiya ug ilang ipailalum ang ilang kaugalingon ngadto sa pagka-masinugtanong pagpailalum sa Pulong sa Dios. Kining maong mga unodnong mga Kristohanon luwas gihapon, apan nagpuyo sila nga sama sa dili mga Kristohanon.

Ang Biblia ba nagahisgut kon unsang matang ang paalabuton nga kinabuhi?

Nagahisgut gyod. Ug usa ka makalolooy nga butang mao nga diha sa daghang mga Kristohanong Kasimbahanan, ang mga kabilin-biling tinuohan sa daghang mga higayon maoy nakatago sa kamatuoran mahitungod sa umaabut nga gipadayag sa Dios diha sa Biblia. Ang pagkahibalo sa umaabut mao ang makapadasig sa tawo aron sa pagtinguha nga maluwas, ug makapadasig sa mga luwas na sa pagsunod sa Dios. Kadaghanan sa mga Kristohanon nagatoo nga ang mga luwas, sa walay katapusan, magpuyo sa “langit”, ang dapit nga anaa sa kawanagnan. Kini nagsukwahi sa tataw nga gitudlo ni Jesus ug sa Biblia. Usa sa mga inilang bersekolo sa Biblia, si Jesus nagtudlo nga “… ang mga maaghup, … magapanunod sa yuta” (Mateo 5:5)

Ang Dios nagbuhat sa kalibutan alang sa mga tawo aron pagapuy-an ug aron magakalipay niini. Ang Biblia nagingon nga sa umaabut adunay bag-ong yuta nga ipuli niining kalibutana nga nagakadunot. Dili makahuluganon sa Dios ang pagbuhat og “bag-ong yuta” kon ang mga Kristohanon adto magpuyo sa langit. Ang Dios magahimo ug bag-o nga yuta sa umaabut tungod kay ang atong gipuy-an karon pagalaglagon. Pipila sa mga butang nga gihisgutan sa Biblia kon unsa ang umaabut:

• Ang Mesias mohari sa usa ka gingharian nga walay katapusan (Daniel 2:44,7:13, 14; Pinadayag 11:17).
  
  
• Ang Mesias mohari gikan sa Herusalem, gikan sa trono ni David (Isaias 9:7).
  
  
• Ang dautan mangalaglag, apan ang mga maaghup makapanunod sa yuta (Mga Salmo 37:9-11; Ezequiel 37:11,12; Daniel 12:2,3; Sofonias 3:8-12; Malaquias 4:1).
  
  
• Ang mga luwas mahibalo sa Dios (Isaias 29:23,24; Jeremias 31:33,34; Ezequiel 11:18-20, 1 Mga Taga- Corinto 13:12).
  
  
• Unya adunay kaangayan sa kalibutan (Isaias 2:4; 6:6,7; 11:1-5; 32:1,2,5,16,17;Jeremias 23:5,6; 33:15)
  
  
• Wala na unyay gubat (Isaias 2:4; 9:4-7; Miqueas 4:3,4; Zacarias 9:9-11; Oseas 2:18).
  
  
• Ang mga tawo mangaayo sa sakit ug balatian (Isaias 29:18; 32:3,4; 33:24; 35:5,6;Jeremias 33:6; Malaquias 4:2).
  
  
• Ang nga tawo magpuyo nga adunay kasigurohan (Isaias 11:6-9; 32:18; 54:14-17;60:15-18; 65:17-25;Jeremias 23:4-6; 33;Ezequiel 28:26; 34:25-31;Miqueas 5:4,5;Sofonias 3:13-17).
  
  
• Ang yuta mamaayo ug ang kamingawan mahimong maayong yuta (Isaias 32:15;35:1, 2,7; 44:3; 51:3).
  
  
• Adunay kadagaya sa pagkaon (Isaias 25:6; 30:23-26; 35:1,6,7; 41:18-20; 51:3; Jeremias 31:5,11-14; Ezequiel 47:1-12; Oseas 2:21,22; Joel 2:19-26; 3:18; Amos 9:13).

Ang umalabut nga kinabuhing gihatag sa Dios puno sa pagkaon, kalipay ug panag’uban. Lisod hunahunaon ang kinabuhi nga walay sakit, walay gubat o panag-away, wala na ang pagpanaug-daug, daghan nga pagkaon sobra pa gani sa atong makaon sa tibook kalibutan aron malipay ang matag usa ug alang sa makahuluganon nga buluhaton, apan ang mga Kristohanon maka-angkon nianang maong matang sa kinabuhi ug magakalipay sa walay katapusan.

Ang Dios nagtanyag kanimo sa tanan nimong gipangandoy niining kinabuhia apan lisod kaayo nga imong maangkon, ug ang bugtong pamaagi aron imong maangkon kining tanan nga mga butanga mao ang pagdawat sa walay bayad nga gasa sa kaluwasan pinaagi kang Jesu Cristo. Ayaw isalikway kining maong tanyag sa Dios kanimo, ayaw itugot nga dili nimo maangkon ang mga butang nga imong kanunayng gitinguha niining kinabuhia. Isugid pinaagi sa imong baba nga si Jesus mao ang Ginoo- isulti kini sa makusog gayod-ug magatuo ka sa gipamatuod sa Biblia nga si Jesus nabanhaw gikan sa mga patay.

Unsa man ang mahitabo kanako kon dili nako dawaton ang gasa sa Dios nga kinabuhing walay katapusan?

Ang Biblia nag-ingon nga “ang bayad sa sala mao ang kamatayon” (Mga Taga-Roma 6:23). Ang matag tawo nga nabuhi pagahokman ni Jesu Cristo. Kadtong nidawat sa iyang walay bayad nga gasa sa kaluwasan makadawat sa kinabuhing walay katapusan. Bisan pa niana, sila pagahukman aron sa pagsuta kon unsa ang ilang madawat sa sunod nga kinabuhi, kon pagagantihan o pagdisiplinahon sila sumala sa tugbang sa ilang mga binuhatan niining kinabuhia. (2 Mga Taga-Corinto 5:10; Mga Taga-Colosas 3:23-25; 1 Mga Taga -Tesalonica 4:6; 2 Timoteo 2:12; 1 Juan 2:28). Kadtong wala modawat ni Cristo tungod kay wala sila makadungog bahin kaniya o sa iyang mga buhat pagahukman sa angay kanila pinasikad sa Iyang kaalam ug sa ilang mga binuhatan. Kadtong misalikway kang Cristo ug unya namatay diha sa ilang mga kasal-anan itambog ngadto sa linaw nga kalayo ug pagasunogon (Pinadayag 20:15). Busa ang imong pilian mao nga dawaton ba nimo ang gisaad nga kinabuhing walay katapusan diha kang Cristo o kaha pagahukman ikaw pinaagi sa imong mga buhat inay sa mga mabuhat ni Cristo alang kanimo. Dawaton nimo ang kakuyaw sa pagbayad sa imong mga sala, nga mao ang, walay katapusang kamatayon.

Ang sugal ug loteriya inila kaayo sa atong panahon karon, ug ang mga tawo masayud kon sila kapildihon na. Ang Dios nagahatag og “tukma” nga pamaagi kon unsaon pagbaton ug kinabuhi nga walay katapusan. Dunay mga sugarol nga maprotektahan sa ilang pagkaignorante sa adlaw unya sa paghukom, apan pildihonon kaayo na nga sugal. Ang Dios tataw kaayo nga nagaingon nga kon ikaw mangita, makakaplag ka, busa ang tawo nga makadungog ug diyutay apan magahimo ug pagpili sa pagpadayon sa iyang kaugalingon nga kabubut-on dili kini makalingkawas panahon sa paghukom. Kinahanglan nga magpili ka kon dawaton nimo o isalikway ang pagkatawo ug ang gihimo ni Jesu Cristo. Adunay maayong katarungan nganong imong dawaton si (JesuCristo) [Jesu Cristo] ug walay maayong katarungan nga isalikway siya. Nganong aduna may mga tawong nagtuyo sa pagapili sa kamatayon kay sa kinabuhi?

Kasagaran kini nga pagtulon-an diha sa Kristyanismo nga ang dili luwas pagasunugon hangtud sa hangtud, apan dili na mahimong tinuud, tungod kay mahimong ang matag usa aduna diay kinabuhing walay katapusan (bisan ug dili kini maayo nga kalidad sa kinabuhi). Tataw kaayo sa Biblia nga ang luwas lamang ang adunay kinabuhing walay katapusan. Ang dautan makadawat sa bayad sa ilang mga sala-ang kamatayon. Dunay daghang mga bersikulo nga nagpamatuod nga ang mga dautan pagalaglagon, ug ang pamaagi sa pagalaglag kanila mao ang pagsunog kanila. Hinoon, adunay pipila ka mga bersikulo nga mora’g nag-ingon nga ang dautan nga mga tawo pagasunogon hangtud sa hangtud, apan sa orihinal nga teksto kini nagpasabut nga adunay mga tawo nga nagkinahanglan og igong panahon sa pagsunog kanila. Usa kini ka naandang batasan sa Kasulatan nga pasobrahan sa nag-istorya ang iyang gisulti aron makuha ang bout niyang ipasabut. Pananglitan, si Cristo miingon, “Ug kon ang imong mga mata mao ang makaingon kanimo sa imong pagpakasala, lugita ug isalibay kini gikan kanimo” (Mateo18: 9). Natural, malisang siya kon adunay tawo nga magbuhat niana. Ang bout ipasabut ni Cristo mao nga magmatinudanon ka sa paghunong sa imong pagpakasala. Adunay igo nga panahon sa pagsunog sa dili pa ang dautan maugdaw pag-ayo, ug sama kini sa hangtud sa kahangturan alang kanila.

Ang Biblia mao ang Pulong sa Dios ug dili kini magakasumpaki sa iyang kaugalingon. Ang pipila ka mga bersikulo nga ginahubad sa pipila ka mga tawo nga sila miingon nga ang tawo pagasunogon hangtud sa kahangturan kinahanglan pagasabton uban sa daghan ug klaro nga mga bersikulo nga nagaingon nga ang mga dautan pagalaglagon. Ang Malaquias 4:1 maoy usa ka pananglitan sa usa ka klaro nga bersikulo nga nagatudlo nga ang mga dautan mahimong abo. Apan walay katarungan nga kita magpalaglag diha sa nagdilaab nga kalayo. Didto sa bag-ong yuta magkinabuhi ka sa kinabuhi nga dugay na nimo nga gipangandoy- busa ngano nga dili man nimo dawaton si Cristo ingon nga imong Ginoo ug Manluluwas?

Ang panghunahuna nga si Jesu Cristo nabanhaw gikan sa mga patay ug ang hunahuna nga ang Biblia “mao ang kamatuoran” lisod nakong katoohan. Unsa may akong buhaton karon?

Padayon sa pagpangita sa kamatuoran. Ang Dios nagsaad nga kon ikaw mangayo, Siya magatubag. Kining gamay nga basahon, sapagkatinood dili igo nga makasay-say sa tanang butang nga bout nimong masayran. Ang Christian Educational Services adunay mga basahon mahitungod kang Jesu Cristo, sa pagkabanhaw, ang pagka dili masayup ug ang pagkatinood sa Biblia, ug daghan pa. Ayaw kaulaw sa imong pagduhaduha. Ang pagduha-duha ug ang walay kasigurohan dili sama sa pagkamapahitas’on ug pagkagahi og kasing-kasing. Si Tomas nagduhaduha sa pagkabanhaw, apan si Cristo wala magsalikway ni Tomas. Hinonoa si Cristo nagpadayag sa iyang kaugalingon sa paagi nga si Tomas makatoo. Kon ikaw matinud-anon ug mapadayonon nga magapangita kaniya, sigurado nga ang Dios imong makaplagan.

Pipila sa mga butang nga akong nabasa niining maong basahon, mga butang nga wala pa nako nakita kaniadto.

Ang kamatuoran mao ang kamatuoran bisan pa ug wala pa ka makabati niini sukad. Duul sa Ginoo diha sa mga pag-ampo ug diha sa mga Pulong sa Dios uban sa tukma nga salabutan ug pagkamatinud-anon ug sa pagsusi kon unsa gayod ang gisulti sa Pulong sa Dios. Ang Pulong sa Dios magatudlo kanimo sa dalan sa kaluwasan, unsa ang imong maangkon sa diha nga ikaw maluwas, ug asa ikaw magpuyo sa kahangturan. Kami sa Christian Educational Services malipay nga motabang kanimo sa imong pagtoon sa Kasulatan kon kini imong gikinahanglan.